Que leva?
- 250 g améndoa moída
- 50 g fariña
- 300 g azucre de cana, mascabado, integral... mellor canto menos refinado
- 5 ovos
- 2 culleriñas de impulsor (Royal ou semellante)
- raspadura de limón
- azucre branco moído para cubrir a torta
Como se fai?
- Acende o forno a 180 ºC
- Nun cunco amplo, mestura todos os ingredientes agás os ovos.
- Á parte, bate os ovos, engádeos ao cunco e remexe até obteres unha masa homoxénea.
- Engraxa un molde de forno e verque a masa.
- Enforna 45 minutos a 180 ºC
- Cando estea morna ou fría, desmóldaa e cúbrea con azucre branco moído.
Ten en conta que
Hai quen considera que botarlle fariña á torta de améndoa é desvirtuala e rebaixala de categoría, mais nesta cociña somos xente sen lei, allea a conceptos coma pureza ou autenticidade, e facemos o que nos peta. Aínda que é unha cantidade pequena, a min non me parece que lle vaia mal, máis ben todo o contrario.É importante empregar azucre escuro, porque achega un sabor moi especial. Con azucre branco sairía unha torta vulgar, sen ningún carácter, e excesivamente doce.
Podes usar fariña de trigo ou de espelta, branca ou integral, como prefiras, con calquera delas sae ben.
Podes moer o azucre branco para cubrir a torta nun muíño de café, faise nuns segundos. Non moas máis cantidade da que precisas porque non se conserva ben, deseguida absorbe humidade.
Para distribuír o azucre moído de maneira regular sobre a torta, o máis sinxelo é poñelo nun coador e axitalo con coidado sobre toda a superficie.