Que leva?
Para 4 persoas
- 4 ovos
- 2 latas grandes de tomate enteiro
- 2 pementos asados
- 1 cebola
- 3 dentes de allo
- olivas negras de boa calidade (Kalamata, se for posible)
- 2 culleriñas de comiños moídos
- 2 cullleriñas de pemento picante afumado
- 1 culleriña de pemento doce afumado
- sal
- aceite
- perexil
Como se fai
- Pela a cebola e os allos e pícaos miúdos.
- Nunha pota de ferro (Le Creuset ou semellante), bota aceite en cantidade abondo para cubrir ben o fondo. Quéntao e doura a cebola e os allos.
- Abre as latas de tomate, desbota o líquido, esmaga os tomates e bótaos na pota.
- Engade tamén os pementos asados (pelados e sen sementes), os comiños, pemento e sal.
- Deixa cociñar destapado, a lume baixo, uns 15 minutos, remexendo de vez en cando.
- Coa axuda dunha culler, fai un oquiño no prebe. Casca un ovo e bótao nese oquiño. Fai o mesmo cos outros 3 ovos, deixando espazo entre eles.
- Tapa a pota, baixa o lume ao mínimo e deixa cocer ata que os ovos estean cociñados no punto que che guste.
- Xusto antes de servir, acrecenta unha presada de olivas negras da mellor calidade posible e pirixel picado.
- Serve ben quente con pan abondo para mollar no prebe.
Ten en conta que
Aínda que na foto semelle caldosa, a shakshuka non é unha sopa nin un prato de culler, é un prebe espeso.
Moito mellor se podes conseguir tomates frescos ben maduros, dunha variedade con pouco líquido; úsaos no canto dos tomates en conserva. Se fas a shaksuka con tomate en conserva, nunca uses tomate triturado, porque a salsa sairá líquida de máis.
Se non tes unha casserole de ferro (adquisición máis que recomendable, por certo), emprega unha de barro. O importante é que distribúa e manteña ben a calor.
Existen innumerables variantes de shakshuka. En todas as que vin, os pementos dóuranse xunto coa cebola, mais a min paréceme que lle acaen mellor os pementos asados, que o prebe fica máis suave e máis integrado.
Poñer a funcionar o forno para dous pementos é un desperdicio de tempo e de enerxía. Eu adoito encher a bandexa ata os topes, con pementos, berenxenas ou outras verduras: sempre se poden gardar para usar máis adiante noutras receitas.
A shakshuka debe ser picante e especiada, mais se a achares demasiado forte ou picante, axusta os condimentos ao teu gusto.