Que leva?
- 1 Kg repolo
- 350-500 g cabaza
- 40 g boletus deshidratados (un paquete)
- 3 culleradas pasta de tomate concentrado
- 5 dentes de allo coa pel
- 2 culleriñas alcaravea
- 1 culleriña pemento doce afumado
- 1 culleriña pemento picante afumado
- 2 culleriñas de fume líquido
- aceite
- sal
Como se fai?
- Deitar os boletus nun vaso con auga.
- Cortar o repolo en tiras finas, lavalo e escurrilo.
- Pelar a cabaza e cortala en cubos duns 2 cm de lado.
- Nunha tixola ampla e fonda, quentar un pouco de aceite cos allos enteiros aplastados e a alcaravea.
- Saltear o repolo a lume forte, removendo arreo. Baixará moito de volume a medida que vaia perdendo auga.
- Engadir a cabaza e os boletus escurridos (non tires a auga) e remexer.
- Baixar o lume ao medio e cociñar uns minutos, remexendo de vez en cando.
- Engadir o concentrado de tomate, o fume líquido, o pemento doce e picante e o sal.
- Acrecentar a auga do remollo dos boletus e un par de vasos máis de auga ou a cantidade que precise. Debe quedar caldoso, mais non é unha sopa.
- Baixar o lume ao mínimo e deixar cocer uns 10-15 min
- Servir ben quente, en cunca grande. Se fóra chove e vai frío, moito mellor.
Ten en conta que
Está mellor feito de véspera, incluso dous ou tres días antes. Consérvase ben.Facer strapačky vegano é tan ousado como facer caldo sen unto. Hai moitas variantes de strapačky (Eslovaquia) / bigos (Polonia), mais todas as que eu probei levan embutidos afumados e carne de porco curada. Porén, grazas ao pemento afumado e o fume líquido, acádase un sabor bastante logrado. Se non tes fume líquido, podes usar tabasco de chipotle afumado, pero bota pouco e substitúe o pemento picante por doce.
Aínda peor: nesta receita, por mor da facilidade, prescindimos do chucrut, que achega ao prato un toque ácedo característico. A receita orixinal leva os dous: repolo fresco normal e tamén fermentado (chucrut). Eu recomendo vivamente facelo con chucrut, porque sen el o prato perde moito. Debe ser chucrut caseiro (extremadamente fácil de preparar), non serve o chucrut comercial envasado, que lle daría un sabor avinagrado. A acidez do chucrut caseiro procede das bacterias da fermentación, non leva vinagre.
O strapačky de verdade non leva cabaza, eu bótolla porque as planto todos os anos e sempre teño abondo.
Se tes cogomelos frescos, úsaos. Eu uso deshidratados nesta receita porque penso que achegan máis sabor umami.
Onde podo comprar...?
Tabasco de chipotle afumado en hipermercados.Fume líquido en internet. Vino tamén algunha vez en tendas de produtos latinos.