Que leva?
Para 2 bandexas de forno:- 2 plátanos macho
- aceite
- sal e/ou especias (ambas opcionais)
Como se fai?
- Corta as puntas dos plátanos e tíraas. Cun coitelo fai dúas ou tres incisións lonxitudinais na pel, sen chegar á carne, e retira a pel (hai que facer un pouco de forza).
- Córtaos cunha mandolina en liscas finas e déitaas nunha cunca.
- Engade un fío de aceite e sal e/ou especias e remove para que se impregen ben.
- Estende as liscas sobre unha bandexa de forno sen que monten unhan sobre outras. Cada plátano ocupará aproximadamente unha bandexa.
- Enfornar a 180 ºC uns 15-17 minutos. Cando se poñan dourados, están listos.
Ten en conta que
O plátano macho aseméllase máis á yuca que ao plátano de Canarias. É duro e feculento, non é doce e non se pode comer crú.Pode facerse con plátano macho verde ou medio maduro. Canto máis verde, máis crocantes sairán os chips; canto máis maduro, máis saberán a plátano.
É importante úsar mandolina para que todas as liscas teñan o mesmo grosor e se fagan ao mesmo tempo. Con coitelo, é fracaso case seguro.
Hai que vixiar na parte final do enfornado porque se queiman con facilidade. Xamáis deben estar marróns. O tempo exacto e altura da bandexa dependen de cada forno.
Se sobrase (cousa que nunca sucede), gárdao nun recipiente hermético.
Vin por primeira vez esta receita en Minimalist Baker, un blog moi inspirador.
Onde podo comprar... ?
Hai plátano macho en calquera supermercado, incluso tendas pequenas.