Que leva?
Para 4 bramboráky: 
- 500 g patacas
- 1 ovo
- 2 dentes de allo
- 25 g fariña
- pementa
- sal
Como se fai?
- Pelar as patacas e relalas finas. Eliminar toda a auga que solten, poñéndoas nun coador e apretándoas.
- Poñelas nun bol e engadir o allo tamén relado, o ovo, a fariña, sal e pementa. Mesturar ben.
- Ficará un amoado espeso.
- Poñer ao lume unha tixola pequena (aprox. 18 cm diámetro) con pouco aceite.
- Cando o aceite estea quente, deitar unha pequena cantidade do amoado e cociñar. Cando a parte superior comece a secar e a botar burbulliñas, dar volta e cociñar polo outro lado.
- Antes de cociñar o seguinte bramborák, botar un pouco de aceite na tixola.
- Servir quentes.
- Poden comerse sós ou acompañados de calquera outra cousa. O da foto comparte prato con espárragos e cogomelos con améndoas.
Ten en conta que
Aínda que na foto semella groso, o bramborák é fino, duns 5 mm como máximo.Cómpre cociñalo a lume non moi forte para que non se queime o exterior. Non precisa demasiado tempo de cocción, mais si abondo para que se faga o interior, xa que todos os ingredientes están crús.
Malia a apriencia, o bramborák non ten nada que ver cunha tortilla de pataca; é fino e flexible, con textura máis ben de crêpe. Por dentro ficará algo húmido e cremoso e por fóra máis seco e algo torrado.
É un prato moi popular, máis de cervexaría que de restaurante, e vai xenial cunha boa cervexa checa. Tamén se acostuma facelos de tamaño grande, para dobrar ao medio e rechear, coma se fosen crêpes. Na miña opinión, é máis fácil darlles volta e cociñalos ben se son pequenos.
Todos os bramboráky (República Checa) / zemiakové placky (Eslovaquia) que probei en cervexarías son máis aceitosos e levan menos ovo que nesta receita. Para min, deste xeito están ben.
Tamén son moi comúns en Alemaña e outros países de centroeuropa, con pequenas variantes. Por exemplo, en Alemaña adoita levar cebola relada no amoado e servirse con puré de mazá.